Prachin Bharatiy Paridhan Shaili ( प्राचीन भारतीय परिधान शैली)

आजही प्राचीन भारतीयांच्या वस्त्र शैलींविषयी उत्सुकता लोकांच्या मनात आहे. ते कुठले कापड वापरत असतील? त्यांचे कपडे कुठल्या रंगाचे असतील? ते साधे असतील की नक्षीदार? यासारख्या अनेक प्रश्नांची उत्तरे शोधण्यासाठी आपल्याला हा अभ्यास महत्त्वाचा ठरतो. वैदिक, जैन, बौध्द साहित्यामध्ये अशी अनेक वस्त्रांची वर्णने तसेच देशाच्या कुठल्या भागात चांगले कपडे बनत असत याची आपल्याला कल्पना येते. तत्कालीन ग्रंथातून आणि चित्रं-शिल्पांसारख्या कलाकृतीतून केशभूषा आणि वेशभूषाचे विविध प्रकार बघायला मिळतात. कुठलीही कला ही तत्कालीन समाजाची अभिरूची आदर्श व्यक्त करत असते. खरा इतिहास हा केवळ लढायांपुरताच मर्यादित नसून तो समाज मनाचाही विचार करतो, तसेच तो माणसाच्या जीवनाच्या विविध अंगांचा विचार करतो. या सगळ्यांचा आढावा एका पुस्तकात घेण्याचा हा प्रयत्न आहे. या पुस्तकात प्रामुख्याने इ.स.पूर्व ३३०० ते आठव्या शतकापर्यंत वापरात असलेल्या केशभूषा आणि वेशभूषेचा अभ्यास मांडला आहे. त्या काळातील ग्रंथ, शिल्पे आणि भित्तिचित्रे यांच्या साहाय्याने त्याचा मागोवा घेतला आहे.