Dakshin Kashi Prakasha ( दक्षिण काशी प्रकाशा )

प्रकाशाला अत्यंत प्राचीन असा प्रागैतिहासिक, ऎतिहासिक व पौराणिक वारसा लाभला आहे. संपूर्ण खानदेशातील हे सर्वात प्राचीन व पवित्र असे धार्मिक स्थळ आहे. गोमाई, तापी व लुप्त झालेली पुलिंदा ( पयोष्णी ) अशा त्रिवेणी संगमावरील हे तीर्थक्षेत्र असून स्कंद पुराणातल्या सहाव्या खंडात ( तापी महात्म्य ) प्रकाशाचा प्राचीन महिमा वर्णन करणारे अनेक अध्याय आले आहेत. एका तपानंतर ( १२ वर्षांनी ) येणार्‍या सिंहस्थपर्वणीचा उत्सवही भारतात ज्या मोजक्या ठिकाणी साजरा होतो ( हरिद्वार, प्रयाग, उज्जैन, त्र्यंबकेश्वर, प्रकाशा ) त्यात प्रकाशाचा समावेश आहे. महाराष्ट्रात केवळ त्र्यंबकेश्वर व प्रकाशा या दोनच ठिकाणी हा उत्सव साजरा होतो. त्यामुळे प्रकाशाचे तीर्थक्षेत्र म्हणून महत्त्व व पावित्र्य वाढले आहे.